Mest mælda sandrok jarðar?

Þessi fullyrðing segir ekki neitt annað en að fátítt er að mæla "efnisflutninga sandefna með vindi". 

Er trúlega of viðamikið verkefni, bæði á heimsvísu og tæknilega.  Þær eru margar og sumar stórar sandeyðimerkurnar í heiminum, svo sem Sahara sem hefur löngum plagað löndin norðan við Miðjarðarhafið og eyjarnar vestur af í Atlantshafinu með "ómældu" sandroki.

Ég myndi sætta mig við að mælingarnar sem vísað er til yrðu réttnefndar; mesta mælda sandrok á Íslandi árið 2010.

 

 

 

Mesta mælda sandrok jarðar?

Athugasemdir

[Ágúst H Bjarnason, 21.2.2013 kl. 20:27]

Sæl Kolbrún.

Í greininni stendur "Líklega er hér um að ræða einn mesta efnisflutning sandefna með vindi sem hefur mælst á jörðinni".

Er ekki skýringin sú að menn hafa lítið sem ekkert ekkert verið að mæla "efnisflutning sandefna"? 

Ég get ekki annað en verið sammála þér varðandi stóru þurru eyðimerkurnar þar sem sífelldir sandflutningar eiga sér stað.

Kannski er átt við sandflutning  á skömmum tíma í sama rokinu? Það kemur ekki fram í Mbl. fréttinni en aftur á móti í greininni sem vísað er til http://www.nature.com/srep/2013/130213/srep01257/pdf/srep01257.pdf

Moggafréttin er sem sagt villandi eða a.m.k. mjög ónákvæm.

[Kolbrún Hilmars, 22.2.2013 kl. 15:49]

Rétt hjá þér, Ágúst.  Mér tókst að vera jafn villandi og ónákvæm í pistlinum og fréttin sjálf er - aldrei skyldi seinn maður flýta sér...

M.a. var ég að hugsa hvort enginn munur væri gerður á "efnisflutningum" sandefna og gosefna.   Best væri eflaust að sandur eyðimarkanna hreyfðist sem minnst en á móti gott að losna við öskufargið.

En ég skil ekki hvernig hægt er að mæla svona "efnisflutninga" með nákvæmni, hvort sem er.  Áreiðanlega er hægt að mæla vatnsmagnið sem hleypt er úr uppistöðulóni með því að hafa þar teljara - en varla það sem vindurinn feykir á land?

[Ágúst H Bjarnason, 23.2.2013 kl. 00:14]

Sæl aftur.

Mér fannst pistill þinn hreint ekki villandi og ónákvæmur, þvert á móti þá fékk hann mig til að lesa fréttina oftar en einu sinni, því mér fannst fréttin mjög óskýr.

Ekki veit ég hvernig menn mæla svona efnisflutninga í moldroki, en hugsanlega er hægt að áætla magnið með því að skoða loftmyndir frá gervihnöttum.  Það er þó frekar áætlun en mæling. Ekkert líkt hefðbundinni mælingu á t.d. vatnsrennsli eins og þú segir réttilega.

Ég hef stundum orðið vitni að sand- og moldroki frá Haukadalsheiði í uppsveitum Árnessýslu. Það getur verið mikið í stífri norðanátt, en er þó aðeins svipur hjá sjón miðað við það sem var fyrir nokkrum áratugum.  Lúpínan sem sáð hefur verið í örfoka landið hefur séð til þess.

[Kolbrún Hilmars, 23.2.2013 kl. 11:04]

Já, merkilegt hvað mörgum er illa við lúpínuna.  Reyndar sauðkindina líka, en áhrif eldgosa og öskufalls varla talin með.

Mig minnir að það hafi verið sumarið 1969 sem ég fór fyrst í Landmannalaugar.  Í félagsskap fólks sem var hagvant í Landssveitinni, sem á upprekstrarrétt þar uppfrá.  Mér kom á óvart græna slikjan sem var yfir öllum söndunum, bæði efst í Þjórsárdal og svo norður eftir öllu.  Ferðafélagarnir útskýrðu að þarna væri í gangi uppræktun á fyrrum "eyðimörk".

Næst fór ég á þessar slóðir, upp að Búrfelli, kvöldið eftir að Hekla  byrjaði að gjósa 1970.  Þá var svo hvasst í gífurlegu gjóskufalli að varla var stætt útivið, hvað þá "andandi". 

Líklega var það sumarið þar á eftir þegar leið mín lá næst í Landmannalaugar, með sömu ferðafélögum.  Þá var grængresið horfið og allir sandar orðnir öskugráir aftur.  Langt niður Þjórsárdal.