Heimasætan bíður óróleg

á meðan forráðamenn hennar semja við væntanlega tengdafjölskyldu. 

Nú hefur heimasætan beðið í hátt á þriðja ár, en er að gerast óþolinmóð, því einungis 1/4 hluta reglanna, sem tengdafjölskyldan setur, hafa verið samþykktar af hennar fólki.   Henni er sagt að verið sé að semja um einar 35 höfuðreglur sem henni verður gert að fylgja í hjónabandinu, en hún hefur þó samt aðeins óljósa hugmynd um hverjar þær eru.  

Heimasætan vonar þó að þegar allt er klappað og klárt; öll hennar fjármál, forsjá og sjálfsákvörðunarréttur hafa verið afhent tengdó, þá muni henni gefast kostur á að segja hátt og snjallt NEI við altarið.  Samt er hún ekki örugg - hvað ef presturinn er annað hvort heyrnarlaus eða þykist ekki heyra?

Frá upphafi var heimasætan aldrei alveg sannfærð um að hjónabandið gæti lukkast, en eftir að sögur fóru ítrekað að berast um ístöðuleysi brúðgumans líst henni nú enn síður á ráðahaginn.  Ætti hún e.t.v. að fara fram á að þessum hjónabandshugmyndum verði frestað um sinn?

 

Skref áfram í viðræðum við ESB

Athugasemdir

[Heimir Lárusson Fjeldsted, 12.12.2011 kl. 17:55]

Góð!

[Ásthildur Cesil Þórðardóttir, 12.12.2011 kl. 20:28]

Já auðvitað á hún að hætta við, eða minnsta kosti setja málið á ís.  Flott grein hjá þér Kolbrún.

[Jón Óskarsson, 13.12.2011 kl. 08:41]

Snillingur Kolbrún :)

[Kolbrún Hilmars, 13.12.2011 kl. 13:39]

Þakka ykkur fyrir vinsamlega krítík 

"Raunir heimasætunnar" gætu hæglega orðið að smásögu - ef tími gæfist til.  Alla vega vantar ekki efniviðinn...

[Jón Óskarsson, 13.12.2011 kl. 14:14]

Ég bíð spenntur eftir að lesa framhald sögunnar hjá þér.   Hef aftur á móti mun minni áhuga á að lesa útgáfu utanríkisráðherrans :)

[Ásthildur Cesil Þórðardóttir, 13.12.2011 kl. 14:31]

Alltaf gaman að góðum sögum.

[Kolbrún Hilmars, 13.12.2011 kl. 15:19]

Já, sagan gæti orðið æsispennandi, svona af "róman" að vera.  Nú er t.d. allt útlit fyrir að heimasætan þurfi að giftast bróður hins fyrirhugaða brúðguma 

[Ásthildur Cesil Þórðardóttir, 13.12.2011 kl. 18:32]

Svona ég er afi minn dæmi

[Kolbrún Hilmars, 14.12.2011 kl. 13:14]

Já, eitthvað svoleiðis,  Ásthildur