Mismunun hvað?

Neyðarlögin voru sett til þess að halda íslensku þjóðfélagi gangandi, þrátt fyrir bankahrun sem var ekki alfarið íslenskum um að kenna.

Svo ég vitni í MBLgrein Stefáns Más Stefánssnar og Lárusar Blöndal þ.6/7´09:

"Meginatriðið er að innstæðueigendur útibúa, t.d. í Bretlandi og Hollandi, eru ekki tengdir íslenskum hagsmunum með sama hætti og menn og fyrirtæki með heimili hér á landi, t.d. með hliðsjón af fjárfestingum, félagslegri aðstoð, sköttum og fleiri atriðum. Af þessu má ráða að innistæðueigendur í erlendum útibúum íslenskra banka voru í annarri stöðu en þeir sem áttu inneignir í sömu bönkum hér á landi. Réttarstaða þeirra var með öðrum orðum ekki sambærileg". "Þessu til viðbótar er rétt að koma því á framfæri að það er vel þekkt í Evrópurétti að ráðstafanir sem kunna að fela í sér mismunun en eru engu að síður óhjákvæmilegar vegna þjóðfélagsþarfa í almannaþágu fá staðist".

Þannig voru neyðarlögin hugsuð og sett; til þess að almúginn hefði aðgang að launareikningum sínum, hvort sem á þeim var inneign eða yfirdráttarskuld. Í flýti gert en sanngjarnt á þeim tímapunkti.

Verði okkur svo öllum að góðu ef við verðum rukkuð um þá þúsundkalla sem sum okkar áttu hugsanlega í inneign á launareikningnum, svona rétt upp úr mánaðamótum og launaútborgun. Þau okkar sem skulduðu hins vegar annað eins eða meira í yfirdráttarlánum á sambærilegum launareikningum - verðum við stikkfrí? Já, mismunun hvað - það er alltaf spurningin.

EES hugsanlega í uppnámi

Athugasemdir

[Jóhannes H. Laxdal, 19.8.2009 kl. 22:20]

Þeir sem áttu yfirdráttarlán hefðu ekki verið "stikkfrí" ,  það yrði gengið á eftir skuldinni af þrotabúi bankanna einsog hverri annarri skuld við bankann og þar með er ég hræddur um að ansi margir myndu bætast við á gjaldþrotaskrá því ég efast um að það séu margir sem hafa yfirdráttarheimildir sem gætu borgað hana á einu bretti.

[Kolbrún Hilmars, 19.8.2009 kl. 22:39]

Sammála þér Jóhannes.  Ég held að það sé svolítið ofmælt að íslenskar innstæður hafi notið verndar umfram erlendar því eflaust voru það einmitt íslenskar yfirdráttarskuldir sem nutu verndar!  Útlendum hefur bara ekki verið sagt það, frekar en margt annað!

En það hentar ekki "nýju" bönkunum að birta neinar tölur svo við getum vitað hvort við höfum rétt fyrir okkur eða ekki.  Á meðan verðum við að giska á og fullyrða þangað til einhver viskubrunnurinn finnur sig í því að leiðrétta okkur.