Nei takk!

Ég vil ekki gerast meðeigandi að fangelsi. Aftur á móti vildi ég gjarnan verða meðeigandi að nokkrum íslenskum jörðum.

Árni Gunnarsson fv.þingmaður skrifaði ágæta grein í MBL þann 24. mars með yfirskriftinni "ERUM VIÐ LÍKA AÐ GLATA VATNINU".

Í greininni reifar Árni hugsanleg örlög íslenska drykkjarvatnsins. Ekki ætla ég að endurskrifa greinina hér en m.a. segir hann: "Á síðustu árum hafa auðmenn keypt jarðir víða um land. Jarðirnar skipta hundruðum og má greina að með mörgum þeirra fylgja mikil vatnsréttindi".

Í útvarpsviðtali í dag bætir Árni aðeins við og segir að telja megi víst að þessir svokölluðu auðmenn hafi tekið lán hjá erlendum bankastofnunum og margir verði senn eða séu nú þegar gjaldþrota. Þannig sé ekki útilokað að hinir erlendu lánardrottnar gangi að veðunum - sem eru jarðirnar.

Ég vil miklu heldur að lífeyrissjóðsinneignir landsmanna verði nýttar til þess að innleysa þessar jarðir heldur en fjárfesta í fangelsum.

Lífeyrissjóðir fjármagni byggingu fangelsis

Athugasemdir

[(IP-tala skráð) 31.3.2010 kl. 17:37]

Þetta tek ég heilshugar undir, svo skal ég kaupa eina ef finnst á sanngjörnu verði.

[Kolbrún Hilmars, 31.3.2010 kl. 19:08]

Takk Silla mín, ég vona að þú finnir jörðina þína - veit að þú ert að leita. Sjálf á ég smáhlut í víknajörð þarna austur frá, en veit ekki um önnur þinglýst hlunnindi en varðandi hvalreka sem þarf að skipta með Desjamýrarkirkju :) Allavega segir þar ekkert um drykkjarvatn. :)

En þetta með allar hinar jarðirnar og vatnsréttindin sem fylgja þeim? Ég tek viðvaranir Árna alvarlega og vildi óska að það gerðu fleiri!

[Kolbrún Hilmars, 4.4.2010 kl. 17:00]

Hvað varðar fangelsismálin sjálf, sem ég sniðgekk í þessari færslu, þá dettur mér í hug borgin Heidelberg í Þýskalandi. 

Þar eru íbúar 150.000 miðað við síðasta manntal, eða um það bil helmingi færri en íslendingar.   Semsagt; á Íslandi er mannfjöldinn á við tvær Heidelbergborgir.

Hvað gera Heidelbergbúar svo ef fangafjöldinn tvöfaldast snögglega þar um slóðir af "gestavöldum"?  Hlaupa þeir upp til handa og fóta og reisa fangelsi í gríð og erg til þess að sinna eftirspurn?  Skyldu þeir líta á þetta sem "lokal" vandamál? 

Eða hugsa þeir sem svo að borgin þeirra hafi ekki efni á því að hýsa brotamennina, og slái á þráðinn til þeirra sem "eiga" brotamennina og biðji þá vinsamlegast að koma og hirða þá upp?