Er ESB nú þegar að hrynja - innanfrá?

Það er ekkert lát á hrylllingssögum frá hinum ýmsu aðildarþjóðum bandalagsins; nú síðast um Litháen á kúpunni, aðrar þjóðir sem gefast upp á Evrutengingunni,  franskir bændur krafnir um endurgreiðslu á milljarða landbúnaðarstyrkjum, atvinnuleysið slagar hátt í 20% víða,  svo tæpt sé á öllum þeim hrakförum aðildarþjóðanna sem undanfarið hafa verið til umræðu í fréttum.

Er nú að koma í ljós að það var ekki nóg að samræma gjaldmiðilinn, Evruna?  Hefði ekki jafnframt þurft að samræma launataxta og vöruverð?  Hefði hugsanlega FYRST átt að huga að síðarnefndu samræmingunni ef hinn frjálsi markaður og hin frjálsa samkeppni ætti að virka þannig að allar aðildarþjóðir væru jafnar?  Þá hefði heldur engin þörf verið fyrir alla þessa styrki, sem sumir hafa leyft sér að fullyrða að hafi á stundum runnið í skakka buxnavasa.

Er svo komið að nú þegar er búið að þurrausa sumar aðildarþjóðanna af fjármagni og hinna bíði sömu örlög - síðar?    Skyldi vera að hið frjálsa flæði fjármagnsins - og þar með auðvaldsins - með aðstoð Evrunnar, sé megintilgangurinn eftir allt saman?

Athugasemdir

[Haraldur Hansson, 6.8.2009 kl. 17:36]

€vran kom fyrst af því að hún átt að nýtast sem (pólitískt) tæki til að sameina ríki sambandsins. Það var hluti af því "að efla Evrópuvitund".

[Kolbrún Hilmars, 6.8.2009 kl. 18:46]

Haraldur þú hefur áreiðanlega rétt fyrir þér með þetta pólitíska bragð, sem er hreint ekki víst að almenningur ytra hafi gleypt, sem gæti aftur skýrt tregðu forystumanna til þess að bjóða almúganum upp á atkvæðagreiðslur.

Sjálf hafði ég ekkert velt praktískum innri málum ESB fyrir mér fyrr en ég las viðbrögð franskra við grein Evu Joly í Le Monde.  Þar sýður á mörgum... 

[Haraldur Hansson, 6.8.2009 kl. 19:08]

Evran var ekki aðeins hugsuð sem sameiginleg mynt heldur "einnig til samræmingar peningamálastefnu aðildarríkjanna og samstarfs um efnahagsstefnu". Spurning hvort hún geti virkað til fulls nema með sameiginlegum fjárlögum. Mun sá tími koma?

[Kolbrún Hilmars, 6.8.2009 kl. 20:01]

Ég efa það eins og málum virðist nú komið.   Stjórnvöld kjarnaþjóðanna; þjóðverja, frakka og breta, gleymdu að tryggja sér samþykki þegna sinna.  

Þýskur almenningur fórnaði sér fyrir austur-þýska eftir fall Sovíet og munu áreiðanlega ekki reiðubúnir að færa fleiri fórnir í bili.    Eins og ég nefndi áður, eru frakkar ekki par hrifnir og þar að auki uppá kant við bretana, sem frökkum þykja sjúga til sín það sem þeir kalla "heiðarlegt" fjármagn.  Svo þarf ekki að fletta mörgum breskum dagblöðum til þess að sjá viðhorf bresks almennings; sem oftar en ekki jaðrar við að jafna Brussel við jörðu.

Það er næstum sama hvar er borið niður; enginn virðist þola ESB apparatið - nema kannski gömlu Benelux löndin og Svíþjóð...