Stefna framboðanna.

Þar kom að því að ég gæti hrósað Fréttablaðinu, en á bls.38 í blaði dagsins birtir það svör við 24 spurningum sem það lagði fyrir forystumenn framboðanna sjö og bað um stutt og hnitmiðuð svör.

Fór að grufla í bæði spurningum og svörum, en öllum spurningum mátti svara með einföldu jái eða nei-i.  Niðurstöður mínar urðu þessar þegar ég var búin að útiloka öll vífilengjusvör:

Frjálslyndi flokkurinn:   13 já/nei svör

Framsóknarflokkurinn:  9 já/nei svör

Vinstri græn:   14 já/nei svör

Borgarahreyfingin:  7 já/nei svör

Samfylkingin:  2 já/nei svör

Sjálfstæðisflokkurinn:  13 já/nei svör

Lýðræðishreyfingin:  5 já/nei svör

Ég þakka Fréttablaðinu fyrir að einfalda málið fyrir tvístígandi kjósendur! 

 

 

Athugasemdir

[Ragnar L Benediktsson, 19.4.2009 kl. 21:57]

Merkilegt eða ekki merkilegt. Þegar vinstri grænir nefna blandaða leið. Þ.e. hækkun skatta og lækkun launa opinberra starfsmanna er hvergi minnst á hverjir eigi að lækka í launum og hve mikið ekki heldur hvaða skattar eigi að hækka og hve mikið.

Ætla þeir að lækka launin um ákveðna prósentu á alla eða á lækkunin að vera eftir tekjum ? Á að hækka alla skatta eða á að taka upp skattþrep ? þetta forðast þeir að tala um.

Gæsalappaformaðurinn ætlar ekki að hækka skatta en hrellir okkur með því að Samfylkingin setji á eignarskatt. Ef Samfylkingin ætlar að setja á eignarskatt, á hvaða eignir ætla þeir að setja hann ? Gæsalappaformaðurinn segir að skatturinn verði lagður á eldri borgara. Hvað segja hinir ?

[Kolbrún Hilmars, 20.4.2009 kl. 09:36]

Sæll Ragnar.  Það eru einmitt þessi óvissusvör sem gera kjósendum erfitt fyrir að velja. 

Starfs míns vegna þekki ég aðeins til hvernig eignarskatturinn "virkaði" áður en hann var aflagður fyrir  örfáum árum.  Yngra fólk er yfirleitt það skuldsett vegna húsnæðiskaupa og námslána að rauneign er innan lágmarks hvort sem er.

Það er því rétt ályktað hjá þér að verst kemur eignarskattur niður á eldra fólki sem á skuldlausar húseignir en ekki nægar tekjur til þess að greiða skattinn.  Það er nú allur stuðningurinn við þá hugmynd að gera öldruðum kleift að búa sem lengst heima. 

Auk þess teljast bankainnstæður og önnur sparnaðarform með eignarskattsstofni, svo hætt er við að fólk kjósi frekar að geyma aurinn sinn undir koddanum ef fjármagnstekjuskattur og eignarskattur éta upp ávöxtunina.