Óhætt að líta alvarlegum augum

á svona framkomu, alveg burtséð frá því hvort fórnarlambið er þingmaður eða almennur borgari.  Nógu erfitt er að hálfhátta sig á almannafæri, þótt sum okkar með ýmis hjálpartæki, innra eða ytra, þurfum ekki að gjalda fyrir það sérstaklega.  Sjálf hef ég margoft lent í skönnun og líkamlegri þuklleit bæði hérlendis og ytra og alltaf hefur það verið jafnógeðfellt.  Þó nýt ég þess að mitt hjálpartæki er aðeins gert úr silicon.

Isavia lítur málið alvarlegum augum

Athugasemdir

[Þorsteinn Siglaugsson, 14.4.2018 kl. 20:05]

Svona framkoma er dæmigerð af hálfu opinberra starfsmanna hérlendis. Spilling, valdhroki og dónaskapur eru þeirra ær og kýr.

[Kolbrún Hilmars, 14.4.2018 kl. 21:50]

Eflaust eru vandræði með mannaráðningar fyrir þetta starf og hreint sakavottorð gengur sennilega fyrir kunnáttu í kurteisi og mannasiðum. 
En samt mætti nú efna til svo sem vikunámskeiðs fyrir nýgræðinga, því  
valdhroki og dónaskapur lærist aðeins af þeim gömlu og ráðsettu ef engin fyrirmynd er önnur í starfinu.

[Helga Kristjánsdóttir, 14.4.2018 kl. 22:44]

Hvað ef farþeginn væri með "stóma" sem getur bilað í festingunum. 

[Kolbrún Hilmars, 14.4.2018 kl. 23:09]

Þessi líkamsleit miðast við unga og fullfríska.  Allir aðrir eru bara til tafa og vandræða.

[Helga Kristjánsdóttir, 15.4.2018 kl. 03:18]

Ó já ég er hætt að fljúga.

[Ásbjörn Kristinsson, 15.4.2018 kl. 07:23]

Þarf ekki alltaf að taka fréttum með varúð þar sem einungis eitt sjónarhorn kemur fram? Hvað ef maðurinn var með hroka sjálfur gagnvart starfsmanninum?  Kannski var hann ósamvinnuþýður? Svona leit á aldrei að fara í manngreinarálit. Veröldin er bara orðin þannig að þetta er eitthvað sem við verðum að sætta okkur við hvort sem við erum þingmenn eða eitthvað annað. Ef hliðið gerir athugasemd þarf að leita á manni hvort sem maður er með gerfihné eða eitthvað annað. Þannig er ferlið veri ég það fyrir.

[Ásbjörn Kristinsson, 15.4.2018 kl. 07:26]

"Geri ég ráð fyrir" átti það að vera. 

[Ágúst H Bjarnason, 15.4.2018 kl. 08:39]

Ef hliðið blikkar og pípir þegar ferðalangur fer þar í gegn á auðvitað að byrja á því að spyrja hann hvort eitthvað sé í vösunum, eða hvort skýringin geti verið önnur. Allmargir eru með ígrædda málmhluti, svo sem liði í hné eða mjöðm. Hryggjaliðir geta verið spengdir eða bein nelgd eftir slæm beinbrot. Margir hjartasjúklingar eru með ígræddan gangráð.  Handskanninn staðfestir síðan þessar upplýsingar á einfaldan hátt.

Að byrja á því að skipa mönnum (konur eru líka menn)upp á pall og byrja á því að þukla á kynfærum fólks er bara merki um ruddaskap og tuddaskap. 

Danski þingmaðurinn skýrði frá því að fyrrabragði að hann væri með gervilið í hné, enda væntanlega vanur starfs síns vegna að ferðast með flugi. Hann er þó greinilega óvanur að ferðast til landa þar sem svona framkoma öryggisvarða fær að viðgangast.

Svo mættu starfsmennirnir auðvitað byrja á því að bjóða góðan dag eða gott kvöld, eins og starfsmenn Spalar gerðu í bæði skiptin í gær þega ég átti leið um göngin. Starfsfólkið í Bónus og öðrum verslunum kann jafnvel þá sjálfsögðu mannasiði.

Það sem vantar í flugstöðinni er tilsögn ISAVIA og eftirfylgni með því hvort starfsmennirnir séu starfi sínu vaxnir.

-

Man ekki einhver eftir því þegar háaldraður heimsfrægur sænskur rithöfundur var niðurlægður í flugstöðinni fyrir allmörgum árum þegar hún var berháttuð? Þá skammaðist ég mín mikið.

[Aztec, 15.4.2018 kl. 12:15]

Góð athugasemd hjá þér, Ágúst.

Það mætti leiða hugann að því hvort þetta hafi verið ófsóknir vegna þess að maðurinn var þingmaður Danska Þjóðarflokksins (Dansk folkeparti) og starfsmaður Isavia hafi vitað það. Það kæmi mér ekkert á óvart eins og pólítískur rétttrúnaður eitrar allt hér á landi. Sér í lagi er það froðufellandi fordómafulla vinstraliðið sem er þar í fararbroddi.

[Heimir Lárusson Fjeldsted, 15.4.2018 kl. 13:32]

Því miður er nauðsynlegt að vera meðöfluga  öryggisgæslu, þótt stundum virðist hún úr hófi fram.

[Ásbjörn Kristinsson, 15.4.2018 kl. 13:37]

Slakið aðeins á samsæriskenningunum ☺ Ég hef aldrei nokkurn tímann orðið var við annað en kurteisi að hálfu starfsmanna á Keflavíkurflugvelli. En ég skil líka vel að þeir gefi sér ekki mikinn tíma í kurteisishjal enda starfið þess eðlis að þeim er ætlað að pikka út og stöðva þá sem hugsanlega geta valdið skaða. Ef það þýðir að ég eða þú eða þingmaður frá Danmörku þarf að sætta sig við leit þá er það bara gott mál á meðan þeir ná að stoppa skúrkana. Ef ég skil þetta rétt þá er maðurinn beðinn um að stíga upp á pall eftir að hliðið pípti og þar fór hann að veifa vegabréfinu sínu og tilkynna að hann væri danskur þingmaður. Eins og það skipti einhverju máli. Kannski er hann vanur því að það sé nóg. Var hann með vottorð upp á gerfiliðinn sem hugsanlega hefði getað einfaldað málið? Efast um að starfsmaðurinn hafi verið að þukkla á kynfærum mannsins meira en hann hefur þurft starfs síns vegna. Ef hann hefur yfir höfuð snert þau. Berum virðingu fyrir því ágæta fólki sem starfar við að gæta öryggis okkar. Það er árangursríkasta leiðin til að njóta virðingu þeirra held ég.

[Kolbrún Hilmars, 15.4.2018 kl. 14:41]

Þakka ykkur öllum innlegg í umræðuna.  Þessi líkamsleit er og verður alltaf vandræðaleg - en eins og allir vita þykir hún nauðsynleg, og þá er mikilvægt að ekki sé hún harkalegri en þarf.  Það er ekki öllum í eftirlitinu gefið að "sýna aðgát í nærveru sálar".  Úr því mætti þó bæta.

[Aztec, 16.4.2018 kl. 00:46]

Ásbjörn, starfsmaðurinn bað trúlega ekki um vottorð og þótt því hefði verið veifað framan í hann þá hefði hann sennilega ekki skilið eitt bofs. Dönskukunnáttan hér á Íslandi er alveg á núllpunkti.