Raunir garðræktandans

Fólk er hvatt til þess að nýta garðinn sinn og rækta þar grænmeti allrahanda. Mjög jákvætt og ekki aðeins fyrir útiveruna heldur líka stoltið að uppskera eftir fyrirhöfninni.

Garðræktandinn ákvað því að gera skurk í því snemma s.l. vor þar sem aðstæður leyfðu í garðinum.  Keypti verktakaþjónustu til þess að fjarlægja gamlan og úldinn jarðveg í skiptum fyrir fyrsta flokks.  Megnið af plássinu var reyndar ætlað undir kartöflur, en afgangurinn fyrir gómsætt grænmeti.

En þeim tilkostnaði var kastað á glæ.  Áður en nokkru varð potað niður í nýja jarðveginn voru nágrannakettirnir búnir að merkja svæðið sem sitt einkaklósett.

Þar með aflagði garðræktandinn allar áætlanir um grænmetisrækt, en af þrjóskunni einni saman setti hann að lokum niður þau kíló af kartöfluútsæði sem höfðu beðið nægrar spírunar.

Nágrannakettirnir eru enn að leggja til áburð, þrátt fyrir grænu kartöflugrösin.  Brjóta bara niður grösin ef þau eru fyrir "hægindunum".

Afar ólystilegt!  Hver vill rækta grænmetið sitt í kattakassanum?  Kattaeigendur?

 

 

Athugasemdir

[Helga Kristjánsdóttir, 24.7.2012 kl. 23:05]

Geðslegt eða hitt þó heldur.

[Kolbrún Hilmars, 25.7.2012 kl. 16:13]

Þakka þér samúðina, Helga. :)

Eins og einhverjir hafa tekið eftir skrifaði ég um nágrannaketti. Það er auðvitað vegna þess að hér á bæ eru engir heimakettir.

En það er ekki úr vegi að kynna nágrannakettina, sem ég þekki ekki nema í sjón. Einn er svartur, annar gulur og hinn þriðji grár.

Þessir sömu kettir eru líka til vandræða þegar ég fóðra fuglana í snjónum. Kettirnir góma alltaf einn og einn fugl og þá fæ ég samviskubit af því að lokka fuglana í gildru katta sem koma mér ekki baun við.

Ósköp vildi ég að lausaganga katta yrði bönnuð!