Hvað kostar ESB pakkinn?

Nú hafa landsmenn haft um það bil eitt og hálft ár til þess að kynna sér djásnin í "gjafa"pakka ESB.  Því hlýtur að vera farið að sjást í botninn, en þar hlýtur reikningurinn fyrir pakkann að leynast.  Víst er að ekki var sá reikningur efst eða utan á eins og gildir almennt um innflutta pakka.

Þar sem ég hef hingað til hvorki heyrt né séð hvað þjóðin þarf, um aldur og ævi, að greiða fyrir pakkann, er mér nú spurn:

Hvert verður árlegt aðildargjald Íslands til ESB ef af aðild verður?

Hvernig verður það aðildargjald reiknað?

Einhver hlýtur að geta svarað þessum tveimur einföldu spurningum, ekki síst þeir sem þykjast kunna að verðmeta allt annað sem pakkanum viðkemur.

 

Athugasemdir

[Ragnhildur Kolka, 15.1.2011 kl. 15:57]

Já, það er orðið vel tímabært að skoða verðmiðann.

[Axel Þór Kolbeinsson, 16.1.2011 kl. 12:33]

http://www.forsaetisraduneyti.is/media/frettir/SkyrslaEvropunefndar-.pdf

Miðað við skýrslu evrópunefndar frá 2007 yrðu brúttógreiðslur til sambandsins ekki minni en 10 ma. miðað við gengi krónunar það árið.  Á móti kæmu einhverjir styrkir og því yrðu nettógreiðslur á bilinu 2,5 ma. og allt að 10 ma.  Þessar tölur miða við gengi krónunar árið 2007 og því væri hægt að hækka tölurnar un 30% - 50% vegna raungengis krónuna.

En ég held að það sé óumdeilt að greiðslur ríkissjóðs til ESB myndu alltaf vera meiri en beinar greiðslur til baka.

[Axel Þór Kolbeinsson, 16.1.2011 kl. 12:34]

Kannski best að taka það skýrt fram að þetta eru árlegar greiðslur.

[Kolbrún Hilmars, 16.1.2011 kl. 17:18]

Takk, Ragnhildur og þér Axel fyrir að vísa á þessa skýrslu. 

Nú skil ég a.m.k. af hverju upplýsingum, sem í skýrslunni felast,  er ekki hampað í ESB umræðunni; tölulega séð er miðað við árið 2005 og síðan þá hefur mikið vatn runnið til sjávar...

Seinni spurningu minni er svarað þar; aðildargjaldið 2007 er miðað við vergar (brúttó) þjóðartekjur.   Á þeim tíma  á bilinu 1.07% til hámarks 1.24%.  Hvert hlutfallið verður eftir boðaðar breytingar á sambandinu  og hækkanir framlaga í því skyni er hins vegar óráðin gáta.

Fyrri spurningunni verður líklega seint svarað, eins og reyndar er tekið fram í skýrslunni.  Efin þar eru jafnmörg og í Icesave III.

Eftir stækkun sambandsins (eftir 2007) og þjóðartekjur (miðað við 2005) eru aðildargreiðslur landsins áætlaðar 8200 milljónir til 10500 milljónir á ári.  Á móti er búist við styrkjum frá ESB, svo sem allt að 46% til landbúnaðar  - varla gleður það kratana   Tekið er fram að "hingað til hefur gengið vel að fá styrki [mitt innskot: á öðrum sviðum] og það myndi varla breytast þótt Ísland gengi í ESB".

Lokaorðin í þessum kafla skýrslunnar eru athyglisverð:  "Til að mæta auknum útgjöldum ríkissjóðs og tekjutapi vegna samningsins [...] má gera ráð fyrir að ríkið geri hugsanlega gagnráðstafanir, t.d. með lækkun framlaga til landbúnaðar og lækkun á framlögum til byggðaverkefna á móti styrkjum frá ESB - sem og hugsanlega með hækkun virðisaukaskatts á matvæli á móti lækkun tolla á landbúnaðarafurðir".

Eftir lestur 4. kaflans í skýrslunni er ég enn vantrúaðri en áður á það að ríkissjóður og þar með almenningur hagnist á ESB aðild!